بقالي يومين بجمع في الكلام اللي كتبتهولك في الستين اللي فاتوا
ووقفت شوية كتير عند أحداث بعينها عند كلام موجوع وكلام سعيد عند كل ألم وأمل اختبرته معاك يمكن تكون مجرد شخصية في دماغي يمكن تكون كوكتيل لكل الناس الحلوة اللي قابلتها في حياتي يمكن تكون حد فقدته بالموت أو بالحياة ويمكن تكون أنا أنا بكل التناقض اللي جوايا أنا اللي عاوزة حد يتكلم وهي تسمع ومتقولش حاجة يمكن تكون انت او انتي أيوة انت بدون اسم ولا صفة ولا هيئة ولا شكل انت المجرد من الأحكام السابقة والرغبة في الجدل الحكيم المبتسم اللي بيهون عليا فتهون ابتديت اكتبلك لما مبقاش حواليا حد يسمع أو لما بطلت اخاف من اللي عاوزة أقوله وبدور على حد يسمعه اخبي الكلام جوا ودانه وقلبه ومن وقتها وانا كل ما أعوز اتكلم بسألك عارف؟! وانا عارفة انك أكتر حد عارف وفاهم وساكت!! وبتبتسم بود