مع أم ضد شراء متابعين على السوشيال ميديا؟
شراء متابعين على السوشيال ميديا ممكن يكون مغري للبعض الاعلانات اللي بتظهر في كل مكان تبشرك إنك هتدفع مبلغ بسيط، وتشتري متابعين أوفياء وحقيقيين مش مزيفيين! بس في الواقع هل ده حقيقي وهل الموضوع مفيد ولا مضر؟
محدش مهتم!!
أساسا أكيد من الحاجات المزعجة جدا لأي حد في الدنيا إنه يتعب في كتابة محتوى وتعديله، ولا يقعد يظبط في صورة معبرة، ولا يصور فيديو ويعمل مونتاج ويجتهد ينزله في ساعات الذروة وبعدين متلاقيش حد داس لايك ولا قال كومنت كأنك في صحراء!
وتدريجيا الموضوع بيحسسك إن المحتوى الهادف والقيم مالوش جمهور، والأحسن نشوف حاجة تافهة نعملها او نبطل الشغلانة! لكن أكيد ده مش الحل!
الحل السحري!
الحل السحري اللي هتلاقي حد بيستهدفك بيه في إعلان هو : شراء متابعين بمبلغ بسيط. وبالتالي هتفكر في الموضوع ،وطبعا هيأكد لك ويحلف لك بحياة ولاده إن الموضوع هيساعدك تنتشر ودول ناس بجد مش أكونتات فيك، وإنه هيوصيهم يتفاعلوا معاك! ثم ماذا يحدث؟
ما تيجي نجرب؟!
كمدربة للكتابة وبوك كوتش بالتأكيد بعلم الناس يعملوا دعاية لنفسهم وتسويق لكتبهم بحب ادرس الموضوع من معاميق معاميقه، قوم إبه وماله يا سيدنا أشتري، واشتريت 10000 متابع على فيسبوك المنصة الأقوى لشغلي.
العداد بيور!
لمدة اسبوع تقريبا الصفحة عندي كانت بتزيد 1500 ل 2000 متابع، معرفهمش، معرفش توجهاتهم ولا إهتمامتهم، معرفش اللي بقدمه بيفيدهم ولا لأ.
طيب هل ده فرق في اللايكات والكومنتات؟ كرائدة أعمال الفلوس اللي بتتكلم مش اللايكات! بس حتى اللايكات محصلتش أصلا!
العميل المثالي!
أكيد طبعا اي حد بيقدم خدمات او منتجات، وعاوز يعمل تسويق لهم، محتاج يفكر بشكل مختلف. ولازم يسال نفسه سؤال مهم ويجاوب عليه: مين العميا المثالي اللي أنا بخدمه وأقدر أقدم له إيه؟ وإزاي هساعده في حل مشكلته أوتحقيق هدفه؟ ولو قدرت اسمع من العميل ده أكتر، هقدر أقنعه يشتري مني بسهولة!
شراء المتابعين فكرة وهمية يمكن الهدف منها تزغلل عين الناس وتخليهم يتابعوك بشكل اعمى عشان مايفوتهمش حاجة. بس ده بيضر البيزنس بتاعك مش بيفيده!
خطوة خطوة!
خطوة بخطوة، لما بتحدد عميلك بشكل مثالي، ثم بالتدريب والممارسة، هتعرف تبقى شاطر في مساعدته، وبالتالي تقدم له قيمة تفيده من محتواك. قاعدة المتابعين بتاعتك هتكبر بالتدريج. ممكن الموضوع ياخد وقت، بس أكيد كنتيجة حتمية، المصداقية والثقة اللي هتتبني بينكم تستحق الوقت، والمجهود ده، وساعتها اخلاص العميل وكلامه عنك هو اللي هيميز شغلك أيا كان مجالك! بمجرد ما يظهر اسمك هتلاقي ناس بترشحك!